ಶಾಶ್ವತ...

ಸಂಭಂಧಗಳ
ಹೊಸ ಹೊಸ
ಚಿಗುರೆಲೆಗಳು
ಅದೆಷ್ಟೇ ಮೂಡಿದರೂ
ಮುಂದೊಂದು ದಿನ
ಮುನಿಸಿನ ಬಿರುಗಾಳಿಗೋ
ಅಥವಾ ಸಾವಿನೊಂದಿಗೋ
ಉದುರಿ ಹೋಗುವುದದು;
ನಾನೆನುವ ಮರವ
ಎತ್ತರಕೆ ಬೆಳೆಸಿದ
ಪರಮಾತ್ಮನೆನುವ
ತಾಯಿ ಬೇರೊಂದೆ
ನನಗನಿಸಿದಂತೆ
ಶಾಶ್ವತವಾಗುಳಿಯುವುದು.

ದಾನ...

ಮುಸ್ಸಂಜೆಯಲಿ
ಆ ರವಿಯು
ಕತ್ತಲ ಸಾವು
ತನ್ನ ಬಳಿಗೋಡಿ
ಬರುತಿರುವುದ ಕಂಡು
ನಗುನಗುತ ಜಗಕೆ
ತನ್ನ ಚಿನ್ನದೊಡವೆಗಳ
ದಾನ ಮಾಡತೊಡಗಿದ

ನೆನೆಯುವಾಸೆ

ಮನದ ಮುಗಿಲ
ತುಂಬೆಲ್ಲಾ
ಅವಳ .ನೆನಪಿನದೇ
ಮೋಡ;
ನೆನೆಯಲೆಂದೇ
ಕೈಯಗಲಿಸಿ
ನಿಂತಿದ್ದೇನೆ
ಸುರಿಯದಿರಬೇಡ.

ಜೈ ಜವಾನ

ಭರತ ಭೂಮಿಯ ವೀರ ಯೋಧರಿಗಿದೋ ನನ್ನ ನಮನ
ಮಾಡಿದರಂದು ಒಳಬಂದ ಪಾಕ್ ಯೋಧರ ನಿರ್ನಾಮ ಹವನ
ನೆರೆಯ ಧೂರ್ತ ನರಿಗಳ ಕುತಂತ್ರ ಯೋಜನೆಯ ಹನನ
ಭೂರಿ ಭೋಜನವನಿತ್ತು ಸಂತಸಪಡಿಸಿದರು ಯಮನ
ಕಳೆದುಕೊಂಡಿದ್ದ ಕಾರ್ಗಿಲಿನದಾಯಿತು ಭವ್ಯ ಪುನರಾಗಮನ
ದುರ್ವಿಧಿ.. ಆಳುತಿಹ ಭೂಪರು ಕೊಡುತಿಲ್ಲ ಈ ಸಾಧನೆಯೆಡೆ ಗಮನ
ಆದರೂ ಬೇಸರದಿ ಕುಗ್ಗದಿರು, ಕೆಚ್ಚೆದೆಯ ಓ ಜವಾನ
ನಿಮ್ಮೀ ಯಶೋಗಾಥೆಯ ಹಾಡುವೆವು ನಾವ್ ಪ್ರತಿದಿನ
ಈ ಹಾಡ ಹಾಡುತಲೇ ಕಳೆಯಲಿ ನಮ್ಮ ಜೀವನ

ಕಾವ್ಯ...

ಬುವಿಯ ಖಾಲಿ
ಹಾಳೆಯ ಮೇಲೆ
ಮೋಡದ ಮನದಾಳದ
ಮಳೆಹನಿಯೆನುವ
ಪದಗಳುದುರಿ
ಹಚ್ಚ ಹಸುರಿನ
ಸುಂದರ ಕಾವ್ಯ
ಸೃಷ್ಟಿಯಾಗುತಿದೆ..

ಸ್ಟಾರು...

ಭರ್ಜರಿ ಕೊಡುಗೆಗಳ
ಮೆಘಾ ಆಫರುಗಳನು
ಕಂಡು ಖುಷಿಯಿಂದ
ಬಲೂನಿನಂತಾದ
ನನ್ನೊಳಗಿನ
ಗ್ರಾಹಕನಿಗೆ
ಸೂಜಿಯಂತೆ
ಕಾಣಿಸತೊಡಗಿತು
ಕಂಡೀಷನುಗಳ
ತನ್ನೊಳಗೆ
ಅಡಗಿಸಿಟ್ಟುಕೊಂಡಿದ್ದ
ಒಂದು ಸಣ್ಣ "ಸ್ಟಾರು"

ಪ್ರೇಮಿ-ಪ್ರಧಾನಿ

ನನ್ನವಳ ಮುಂದೆ
ಮನದ ಮಾತೆಲ್ಲವನು
ಹೇಳಬೇಕೆಂಬ ಆಸೆ...
ಆದರೆ ಯಾಕೋ
ಅವಳು ಬಳಿ ಬಂದೊಡನೆ
ನಾ ನಮ್ಮ ದೇಶದ
"ಪ್ರಧಾನಿ"ಯಂತಾಗುತ್ತೇನೆ.