ಅತ್ತ ಆಗಸದ ನೀಲ ವರ್ಣ, ಇತ್ತ ಭೂರಮೆಯ ಹಸಿರು ವರ್ಣ

ಈ ಬಣ್ಣಗಳ ನಡುವೆಯೇ ನಡೆಯ ತೊಡಗಿದೆಯೇ ಯುದ್ಧ.

ಆಗಸದ ಗೆಲುವಿಗಾಗಿ ಸಾಲು ಕಟ್ಟಿ ಮೋಡಗಳು ಆದವು ಸಿದ್ಧ

ಇಳೆಯ ಗೆಲುವಿಗಾಗಿ ತೊಡೆ ತಟ್ಟಿ ಬಾಳೆ ತೋಟವಾಗಿಹುದು ಸನ್ನದ್ಧ

DEEPASTAMBADA VYATHE

ನಿಮ್ಮೊಳಗಿನ ಆನಂದವನು

ನಾ ಪಡೆಯುವುದಾದರೂ ಹೇಗೆ?

ಬಾನ ಸೂರ್ಯನನು ಹಿಡಿಯುವುದಕಾಗಿ

ಮೇಲೆ ಮೇಲೇರುವ ಚಿಮ್ಮುವ 

ಉತ್ಸಾಹ ನಿಮ್ಮೊಳಗಾದರೆ;

ಮುಳುಗೋ ರವಿಯ ಮುಟ್ಟುವಾಸೆಯಿಂದ

ಕಡಲಿನ ಅಲೆಗಳನೆ ಸೀಳಿ

ಮುನ್ನುಗ್ಗುವ ಚೈತನ್ಯ  ಅವರಲಿ;

ಆ ಬದುಕ ಆಸ್ವಾದಿಸುವಾಸೆ ನನಗೂ ಇದೆ

ಸಿಕ್ಕಲ್ಲಿ ನನಗೂ ಬಾಳ ಸಂಗಾತಿಯ ಜೊತೆ.

ಆದರೀಗ ಯಾರ ಬಳಿ  ಹೇಳಲಿ?

ನಾ ನನ್ನ ಒಂಟಿತನದ ವ್ಯಥೆ.

VYATHYASA

ಭಾವವೊಂದನು ಬಿಟ್ಟರೆ

'ಅ'ಕಾರ ಮತ್ತು 'ಇ'ಕಾರದಷ್ಟೇ

ವ್ಯತ್ಯಾಸ ಅಂದಿಗೂ ಇಂದಿಗೂ;

ಅಂದು ಭಕ್ತಿಯಲಿ ತಲ್ಲೀನರಾಗಿ

ಕುಣಿಯುತ ಹಾಡುತಿದ್ದರು

ಭಕ್ತಿ ಗೀತೆ ರಂಗ ರಂಗ

ಇಂದು ನಶೆಯಲಿ "ಫುಲ್"ಲೀನರಾಗಿ 

ಕುಣಿಯುತ ಹಾಡುವರು

ಚಿತ್ರಗೀತೆ ರಿಂಗ ರಿಂಗ.

NERALINANTE

ನಿನ್ನ ಮರೆಯಬೇಕು

ಎಂದೆನಿಸಿದರು; ನೆನಪುಗಳು

ಮನದಲೇ ಮನೆಯ

ಮಾಡಿದೆ ವನಿತೆ.

ತೊರೆಯದ ರೀತಿಯಲಿ

ಅಂಟಿಕೊಂಡಿದೆ ಮನಕೆ

ಬಯಲಿನಲ್ಲಿ ನೆರಳುಗಳು

ಭೂಮಿಗೆ ಅಂಟಿಕೊಂಡಂತೆ.

NANNAVALA KANASU

ನೀ ಎಲ್ಲಿರುವೆ? ನೀ ಹೇಗಿರುವೆ?

ನನಗಾಗಿ ಹುಟ್ಟಿರುವ ಓ ಚೆಲುವೆ

ಹಗಲಿರುಳೆನ್ನದೆ ನಾ ಹುಡುಕುತಿರುವೆ

ನೀನಾಗಿಯೇ ಎಂದು ನನ್ನ ಬಳಿ ಬರುವೆ ?

ನೀನಿರದ ಈ ಬಾಳಿನಲಿ

ನೋವಿಹುದು ಮನದ ಮುಲೆಯಲಿ

ಸಂತಸದ ನಗುವಿಲ್ಲ ವದನದಲಿ

ಕಾಯುವಿಕೆಯ ನೋವ ಸಹಿಸುತಿರುವೆ ಮೌನದಲಿ

ನಗುವಿನ ಸೆಲೆಯಾಗಿ ಬರಬಾರದೇಕೆ?

ನನ್ನ ತನುವಿಗುತ್ಸಾಹದುಸಿರಾಗಬಾರದೇಕೆ?

ಕಣ್ಣೊಳಗೆ ಮಿಂಚೊಂದ ತರಬಾರದೇಕೆ?

ನನ್ನ ಮೌನದುಪವಾಸವ ಕೊನೆಗೊಳಿಸಬಾರದೇಕೆ?

ಇಂದು ಮನದೊಳಗೆ ಬರಿಯ ನಿನ್ನಯ ಕಲ್ಪನೆ

ಮುಗಿಯಲಾರದ ಹತ್ತು ಹಲವು ಯೋಜನೆ

ಕಾದು ಬಳಲಿರುವ ನನ್ನೀ ಮನದ ಆಲೋಚನೆ

ಆ ಬ್ರಹ್ಮ ನನ್ನ ಕನಸುಗಳನ್ನೇ ನನ್ನವಳನ್ನಾಗಿಸಿಹನೆ??

NESARA

ಮಬ್ಬು ಮಬ್ಬಾದ

ಮಂಜಿನ ನಡುವಲಿ

ಮೈ ತುಂಬಾ ಚಿನ್ನದ

ಒಡವೆಯ  ಧರಿಸಿ

ಬರುವನು ನೇಸರ

ಅವನೇಳುವ

ಮೊದಲೇ ಎದ್ದು

ಅವನ ಸೊಬಗ

ನೋಡಲೆಲ್ಲರಿಗೂ ಕಾತರ

HOLIKE

ಮೊದಲು ಬರುವ ಸಿಡಿಲು

ಜಗದಲಿಹ ಪತ್ನಿಯರಂತೆ

ಚುರುಕಾಗಿ, ವೇಗದಲಿ ಬರುವುದರಿಂದ

ಮತ್ತೆ ಬರುವ ಗುಡುಗು

ಜಗದಲಿಹ ಪತಿಯರಂತೆ

ತಡವಾಗಿ ಬಂದರು ಆರ್ಭಟಿಸುವುದರಿಂದ

ಮುಖ್ಯವಾದ ಕಾರಣವು ಮತ್ತೊಂದಿದೆ

ಗುಡುಗು ಅದೆಷ್ಟು ಆರ್ಭಟಿಸಿದರು

ಜಗಕೆ ಪ್ರಾಣಾಪಾಯವಿರುವುದು ಸಿಡಿಲಿನಿಂದ