CHELUVE...

ಕಾಲೇಜನು ಮುಗಿಸಿ ಹಿಡಿದಿದ್ದೆ ಮನೆಯ ದಾರಿ

ನನಗೆದುರಾಗಿ ಬರಬೇಕೇ ಓರ್ವಳು ಚೆಲುವಾದ ನಾರಿ

ಚೆಲುವಿನಲಿ ಸರಿಸಮರು ಇರಲಾರರು ಆಕೆಗೆ

ಅಪ್ಸರೆಯರು ನುಡಿಯುತ್ತಿದ್ದರು ಈ ಚೆಲುವಿಲ್ಲವೇಕೆ ನಮಗೆ

ಪರಿಚಯ ಇಲ್ಲವಾದರೂ ನನ್ನ ನೋಡಿ ನಕ್ಕಳು

ಆ ಕ್ಷಣವೇ ಆಕೆಯೆನ್ನ ಮನದ ಮನೆಯಲಿ ನಿಂತಳು

ನಾ ನಿನ್ನ ಪ್ರೀತಿಸುವೆ ಎಂದು ಹೇಳಬೇಕೆಂದುಕೊಂಡೆ

ಅದಕಾಗಿಯೇ ನಾನವಳ ಕೈಯ ಗಟ್ಟಿಯಾಗಿ ಹಿಡಿದುಕೊಂಡೆ

ಕರ್ಕಶವಾದ ಸ್ವರವೊಂದು ನನ್ನ ಕಿವಿಗೆ ಬಿತ್ತು

ಸುತ್ತಲೂ ನೋಡಿದರೆ ಗಾಢವಾದ ಕಟ್ಟಲು ಕವಿದಿತ್ತು

ನನ್ನ ಬಳಿ ಮಲಗುವ ಪಿಂಕಿ ಬೆಕ್ಕು ಮಾಡುತಿತ್ತು ಕಸರತ್ತು 

ಯಾಕೆಂದರೆ ಚೆಲುವೆಯ ಕೈಯೆಂದು ಹಿಡಿದಿದ್ದೆ ನಾನದರ ಕತ್ತು

ಅರ್ಥವಾಯ್ತು ಆಗ ನನಗೆ ಇದು ನನಸಲ್ಲ ಕನಸು

ಚೆಲುವೆಯ ಬಗೆಗೆ ಬಂತೆನಗೆ ಬರಬಾರದ ಮುನಿಸು

ಚೆಲುವೆಯನು ಮರೆತು, ಪಿಂಕಿಯನು ಬಳಿ ಕರೆದು ಹೊದಿಕೆಯನು ಹೊದ್ದೆ

ಹತ್ತು ನಿಮಿಷದಲೇ ಬಂತೆನಗೆ ಮತ್ತೊಮ್ಮೆ ನಿದ್ದೆ.